Ońtústik Qazaqstan oblysynda sýǵa shomylý jáne jylytý maýsymyndaǵy oqys oqıǵalar sany ótken jyldyń tıisti merzimimen salystyrǵanda azaıdy. Bul týraly OQO óńirlik kommýnıkasııalar qyzmetinde ótken baspasóz jınalysynda oblystyq tótenshe jaǵdaı departamentiniń ókilderi málimdedi dep habarlaıdy «Egemen.Kz» tilshisi.
«Jyl basynan beri sýǵa ketken adamdar sany 71-den 31 adamǵa deıin, ıaǵnı, 56 paıyzǵa kemidi. Bıyl 1 qazanǵa deıingi esep boıynsha oblystyń sý aıdyndarynda 31 adamnyń sýda qaza bolý oqıǵasy tirkeldi, onyń ishinde 17-si - balalar men jasóspirimder. Shilde-tamyz aıynda adamdardyń kóp qaza bolýy sý aıdyndarynda tirkelip otyr. Bul eńbek demalysy men jazǵy demalys kezeńimen baılanysty»,-dedi Departamenttiń tótenshe jaǵdaılardy joıý bóliminiń bastyǵy Nurjan Ásibekov.
Bólim basshysynyń aıtýynsha, oqys oqıǵalardyń negizgi sebepteri jabdyqtalmaǵan sý aıdyndarynda sýǵa shomylý, balalardyń eresek adamdardyń qaraýynsyz qalýy, sýdaǵy qaýipsizdiktiń qarapaıym qaǵıdalaryn buzý bolyp otyr. Endi kún sýytsa da sý aıdyndaryndaǵy qaýipsizdik máselesi áli ózekti. Sebebi kúz ben qysta balyq aýlaý kezeńi bastalyp ketti.
Baqtııar TAIJAN,
«Egemen Qazaqstan»
Ońtústik Qazaqstan oblysy